مدونة سـعـود Saoud

السلام عليكم ورحمة الله وبركاته

اليوم الخميس والكل راح يسأل عن سبب هالغيبة الطويلة لذلك وبإختصار راح أسرد لكم يوميات هالأسبوع كامل
طبعا من يوم الاحد بدأا لدوام الجامعي وبما أن محاضراتي كلها بعد الساعة 12 الظهر وتنتهي على الساعة 5 المغرب فما راح يكون عندي وقت أدخل النت واتواصل مع اخوة لي في هذه الشبكة
بشكل عام يومياتي الجامعية متعبة جداً خصوصا وانه عندي بعض الصعوبات اللي أسأل الله تعالى أني أقدر أعديها
مرت الأيام عادية حتى يوم الاربعاء اللي كان الكهرباء فيه عندنا في البيت مطفي نصه ونصه مولع

يعني صارلنا يومين عايشين على نص كهرباء وهذا كان للمنطقة كاملة
ومن ضمن الأجزاء اللي ما فيها كهرب الجزء اللي يشغل الكمبيوتر او بالاصح الفيش او البلك او اللي تسمونه
فتميت بدون كمبيوتر يومين كاملين عاد اليوم والحمدلله شغلوه من جديد ^_^

الخميس ما طلعت مكان غير اني بعد صلاة القيام رحت أحد المطاعم اللي ياليتني ما رحتله
عزمت ولد عمي وأخوي وطلعنا للمطعم اللي طول الطريق وانا امدحه لهم وارفع فيه وانا بحياتي ما كلت منه ^_^

وصلنا المطعم اللي كان شكله شبه مقبول ولكن زحمة الناس عنده خلتنا نثق فيه شوي ، نزلنا وحنا نحاول نقنع أنفسنا فيه طلبنا كباب لحم ووصلنا الطلب وكلنا لين ما شبعنا
الطعم لا باس لان الجوع ينسي الواحد الطعم
بس بعد لكم على الطعم
المهم ما كملنا أكلنا وطلعنا منه وأخوي وولد عمي يعايروني طول الطريق على ذوقي بالمطاعم
المهم انا قلت بقلبي يالله عساها خير وما نتلوى من وجع بطونا تالي الليل

المهم هم متحلطمين ويعايروني طول الدرب على المطعم وانا احاول ارفع بالمطعم واكله
لين ما وصلنا المنطقة والا الكهرباء كامل على المنطقة طافي @@
شلون ؟؟؟؟؟
طلع هناك حفارة كانت تحفر وخلال عملية الحفر قطعة سلك كابل الكهرباء
عموما صلحوه ورجعت الكهربا ورجع كمبيوتري يشتغل ^_^

وجيت على طول اكتب هالمدونة لكم

ولكم مني أجمل تحية

سعود

ملاحظة ،، بنت الأجاويد ،،، ربي يحفظج يالغالية أسعدتيني بالسؤال عني ^_^ تحية خاصة لج من سعود

غداً أول أيام الدوام الجامعي للكورس الجديد

لا استطيع ان أجزم ما هو شعوري هذه اللحظة فانا ما بين التشتت
والانطوائية والحزن العميق الذي يتسلله بعض الامل ، لا ادري ان كنت متيقن من مفهوم
الازدواجية العمياء التي تصيب شخصية الإنسان

لماذا ؟

لا نقدر الموقف قبيل لحظة وقوعه ونجني ثماره لحظة وقوعه ؟

لم اعيش مثل هذا الموقف بحياتي موقف ربما لحظته كنت كالأسد حتى
تعجب الكل من صلابة قلبي وشجاعتي بمثل هذه المواقف ولكن ؟

بعد أن هدأ الموقف ومضت ساعات بعد وقت حدوثه كدت أفقد حياتي من
الأسى والحزن ؟

نعم علمت بأن ما يصيب غيري ممكن ان يصيبني ؟

استغفرت الله تعالى وذهب لأعزي أحد العائلات الصديقة لنا وتراودت
الأفكار لي وتلك الصورة المؤلمة

كل من حولي يبكي وانا أحاول أن اهدأ الجميع وكأن لي سبعة ايادي
والسن

مرة أهدأ بكاء الاطفال ومرة أنحني بوقفة صامدة إلى الفتيات وكنت
كالمسعف وصاحب الموقف بنفس اللحظة

الكل يصرخ ويبكي وانا احاول ان أتدارك الموقف وأستجمع قواي
لتهدات الجميع

يا لصعوبة الموقف

حقاً م يكن بالموقف السهل ؟

كدت أن أعيش أسى ينتابني مدى الحياة وربما لن يرحمني هذا الأسى
حتى يحترق قلبي ويموت ولكن

الحمدلله على كل حال أتت الأمور سليمة وعاشت من أفديها بروحي
وقلبي

الىن الساعة 2:13 دقيقة فجراً لا اعلم أن كنت بوعيي أو لا

أسأل الله تعالى لي ولكم العفو والعافية

كتبتها وهي واقعية

تحياتي

سعود

بسم الله الرحمن الرحيم

اليوم السبت ، كان اليوم متعب بالنسبة لي ، مع اني ما
طلعت مكان وكنت راقد لين الساعة 12 الظهر ، عموما بدا يومي عادي من بعد الساعة 12
بجلسة على الأنترنت وقراءة للقرءان الكريم بعد ذلك ، حتى صليت العصر ورجعت البيت
وكنت حاس بدوخة ، فقلت أنسدح شوي وارتاح ولكن دائما النوم لا يرحم فكان اسرع لي من
الاستلقاء العادي .

الحمدلله قعدت قبيل آذان المغرب بدقائق بسيطة ، فطرت
بعد شكر الله تعالى واستعديت لصلاة التراويح ، صليت وطبعا الواحد لما يصلي راح يحس
براحة غير طبيعية

رجعت للبيت ولقيت الشباب والاهل مجتمعين بالمجلس فقعدت
معاهم شوي حتى اتصلي واحد من الأصدقاء وكالعادة يا سعود نروح شوي ندور على المجمعات
ونكرك

طبعا مقدر أرفض طلب من أصدقائي وتوكلنا على الله وطلعت
معاه ، بالبداية رحنا كرك النعيمي اللي صوب الاند مارك وعقبه رحنا لمجمع فيلاجيو ،
وصلنا المجمع وكان ما شاء الله مليان بالناس ، نزلنا وتمشينا شوي داخل ولكن ما
طولنا ، تدرون ليش ؟

أستغرب من بعض الاشخاص من جنسيات عربية ولكن ليست
خليجية ، استغرب من عدم احترامهم لقيم واخلاق البلد ولو على الأقل احترام خلال
الشهر الفضيل

ملابس البنات الله يستر حدث ولا حرج ، انا ما شفت
هالشي بحياتي بقطر بصراحة ، يعني ملابس شبه عارية وجذابة ويمكن تكون اغرائية اكثر
من كونها ملابس موضة ، لن أحدد الجنسيات ولكنها عربية ، اتذكر حرب لبنان قبل سنة او
سنتين قالي احد الاصدقاء بانه تم من عندهم فتح الباب لاهل لبنان بالدخول لقطر بدون
تأشيرة وتوافد الكثير من اهل لبنان لقطر ولكن

تدرون من اللي توافدوا ؟

هم التجار والعوائل الغنية اللي للاسف تناست اخلاق
وقيم اهل لبنان المسلمين ، ما تحملنا القعدة وطلعنا بسرعة ن مرينا وحنا طالعين على
مواقف الحياة بلازا أملا بان نشوف اهل البلد ولكن ….

وحنا نمشي بالسيارة توقف امامنا شاب بجي ستاندر وجنبه
كان جيمس بني او قريب من هاللون ، استغربنا وقفتهم بنص الشارع ويوم قربنا الا الأخ
قاعد يرقم عيني عينك والبنت مستانسة ومتماشية معاه ؟؟؟ والادهى يا ناس ان البنت
معاها اخوانها الصغار والدريول والخدامة ؟

يعني جراة مو طبيعية ، عموما يوم شفنا الاخ معطل السيد
حطينا براسنا وهرنله رفيجي اللي معاي هرن يبط الاذن لين ما وخر عن الدرب بسرعة ،
مرينا بجنب سيارة البت وكانت دريشتها صوبي والبعد بيننا أقل من نص متر ، طالعتها
بخسة نفس وقلت الحمدلله والشكر مافي مستوى ( وهذي من باب اني اوريها قدرها لا أكثر
) ^_^

كمش وجهها واصفر وكانها انقهرت وودها تسوي شي ، مشينا
وطنشنا ، وطبعا لا مشينا محد يقدر يكلمنا ^_^

يوم شفنا كل هذا قررنا العودة للبيت ، فمرينا مطعم
بالطريق وطلبنا عصير أفاكادو لانه عصيري المفضل ورجعنا للبيت ،،،،

تابعت مسلسل نمر بن عدوان وجيت اكتبلكم هالتدوينه

أستغرب من انحدار المجتمع يوم عن يوم ، وأسأل نفسي وين
مكارم الاخلاق عند الشباب ووين الرجولة اللي تخلي البنت تحب الرجال حب حقيقي لا حب
شكلي واتكيت ، طبعا ربطت احداث المسلسل مع حال الشباب اليوم وقلت جملة وحده

مالت على شباب اليوم بس …………… مو كلهم

تحياتي

سعود

السلام عليكم

الوقت : 5.10 دقائق قبيل أذان المغرب

أدري تأخرت ما هنيتكم وباركتلكم بالشهر
الكريم

مبروك عليكم الشهر وان شاء الله ربي يتقبل
طاعتكم

اللي خلاني استغرب

الشيعة ليش دايما يصومون ورانا ، سؤال أفكر
فيه الحين

ما اقصد منه شي لكن طرى فبالي الحين

الله يهديهم

وافطار شهي

سعود ،،،

عودة لكرك النعيمي :

السلام عليكم ، من فترة طويلة ما زرت المكان المعتاد ، اللي دايماً يكون وجهتي
ووجهة الكثير من شباب قطر بآخر الليل ، وآخر الليل يعني مو الفجر ، أولاً اتصلبي
واحد من الربع وقالي يا سعود وينك ؟ قلتله في البيت قالي ياخي شرايك تجي الاند
ونتلاقى هناك ، وطبعا لبست ثوبي وحذفت الغترة على راسي بدون ترتيب محدد ( ترى عادي
طلعة على الماشي ) وركبت السيارة وتوكلت على الله ومشيت ……

وصلت كزاقف الاند والا ما شاء الله زحمة غير طبيعية وكلها شباب يفترون بالمواقف
يعني بالمختصر ما عندهم سالفة ، تقابلت انا ورفيجي وقعدنا نتعازم على السيارات بس
بالعكس ، كل واحد يقول للثاني خل نركب سيارتك ( متعاجزين نسوق ) وبالنهاية انتصرت
انا وركبنا سيارته ……….

على طول رحنا نستنشق رائحة الكرك السحري وأكيد بعد الاستنشاق الشرب وثم
الاسترسال بمذاقه العذب ^_^

وحنا واقفين نسولف ونتبادل الاحاديث والحش بخلق الله ، مرت علينا أشكال وأنواع
من المخلوقات الغريبة (  ناس عاديين بس الله لا يوريكم ) أول المخلوقات كان
شوي ظريف ويدعوا الى الشفقة عليه

عراوي أسود كاتب على الرفرف فوق التاير سراب الصيف ؟!؟!؟! مادري شنو سراب الصيف
او بمعنى اصح شدخل سراب الصيف وعلى قولة رفيجي اللي معاي عيل سراب الشتا شلون …..

ثاني المخلوقات شوي أرقى ، كان على لاند كروزر لكن ما شاء الله عليه مسوي سيارته
لوحة اعلانية ، مو مخلي كلمة ولا لزقه مو حاطها واللي يظحك فيه حاط اميله ، مادري
شالمقصد يعني ؟ أنا فكرت بالبداية يمكن عشان اللي يبي يطلب اعلان يضيفه لكن عقب
عرفت انه كل ما شاف بنات راح نقز بسيارته قدامهم علا وعسا يضيفونه وطبعا في من
البنات المغفلات اللي يحبون هالاشكال ودائما الطيور على اشكالها تقع …….

المخلوق الثالث ما حوله حول ، راكب الرنج وكاشخ حده ومحد قده الأخ مصطلب والغترة
تقول لوح مو غترة لا واذا مر قدامك وفتحتله المجال يكتفي برفعة بسيطة من يده بدون
لا يطالع ( عشان ما يخرب البرستيج ) يجي قدام الكافتيريا يطلب كرك ( يعني شاي
بالحليب للي ما يعرف شنو كرك ) ويعطي العامل خمسة ريالات وما ياخذ الباقي عشان يوري
الناس انه ولد نعمه وانه كريم ،،، وهو ما عنده مسكين غير هالخمسة ….

يحليلهم شباب قطر أنواع واشكال لكن بالنهاية كلهم طيبين …….

طبعا ما راح آخذ لفته على المنظور الاخلاقي لأنه مو متشابه عند الكل ولكن يوم عن
يوم للأسف يقل ويتهدم ، طبعا بعد ما خلصنا سوالف انطلقنا ناخذ فرة على مواقف الاند
ولفت نظري شخص من جنسية عربية ومعاه وحده من نفس جنسيته بلبس خفيف أقرب ما نقدر
نسميه باللبس الصيفي ….

استغربت من وقفتهم الغريبة فقررنا ندور من بعيد لبعيد حتى جا لاند كروزر قطري
وصفط احذاهم وكان داخله شاب قطري كاشخ ، تركناهم ومشينا وحنا نظحك عليهم ، بعد ما
زهقنا نزلني رفيجي عند سيارتي ومسكت خط الشمال الجميل عائداً الى المنزل الجميل ،
وكان الجو رووعة ولكن فجاة صار رطووووبة

شلون مادري ………

دخلت البيت وبدلت ملابسي وجيت على الكمبيوتر اكتب هالموضوع ^_^

كان يوم من أيامي وهو الأحد

تحياتي

سعود

السلام عليكم ورحمة الله وبركاته

موضوع أرقني حبيت اكتبه لكم ،

اليوم الخميس طلعت انا وواحد من الربع نتمشى وهذا الكلام كان على الساعة 11 ليلا مشينا وعبرنا عبر خط الخليج الغربي نتمشى بهدوء وسلولي وفجأة جاني واحد وراي وكان شوي ويدعمني لولا رحمت الله وتداركي للموقف بسرعة
بعصبية كبست ليتي على العالي وراه والا الرجال وقف ، جيت عليه ووقفت جنبه ونزل واحد سوداني ومعاه سبعة كان اغلبهم شاميين

بدأ يتهدد ويصارخ حاولت اعرف طبيعة الرجل فتيقنت بأنه سكران ، واللي أكد هالي انه قرشة الخمر كانت على الكرسي الخلفي من سيارته واضحة وضوح الشمس 0 لا حول ولا قوة الله بالله

يوم شفته سكران قلتله توكل على الله وحاسب مرة ثانية ولكن الاخ قام يسب ويشتم ويفاتن وقال كلمة هي اللي خلتني اكتب هالموضوع وهي

قال ” أنا امريكي يعني شيخك في بلدك ، انا شيخك وشيخ شيخك “
وفعلا أظهر بطاقته الشخصية الامريكية متفاخرا ومستهزئاً بنا نحن أبناء هذا البلد وأين ؟ في بلدنا

فعلا كلمة حزت بخاطري فقمت بعصبية متوجها له ولكن اصدقاءه كانوا ناس محترمين ولو انهم كلهم حثالة ابليس الا انهم تعذرولي وقالولي تراه سكران وما يدري شيقول

عموما تحركت فورا من المكان وبنفس اللحظة اتصل صديقي اللي معاي بالشرطة مبلغا عن هذا الشخص بانه سكران وكان يبي يدعمنا وما الى ذلك
فماذا كان رد الشرطي ؟
اتدرون ماذا ؟

قال تعالى قدم بلاغ رسمي ونرفعه للنيابة

حنا نقوله الرجال يسوق سكران ويلف على الناس وانت تقول تعالوا قدموا بلاغ وانتظروا ومدري ايش ؟

فعلا تذكرت حملة لا للخمور نعم للقسم والدستور وقلت ، ان كنا فعلا وصلنا الى هذا التجاهل لرأي الشعب فنحن نستحق ان تكون امريكا شيختنا وشيخة شيوخنا

قهر ما زلت اعيشه حتى هذه اللحة ولكن سأقول

الله يسامحج يا قطر

مذكرات مواطنالتاريخ : 15/8/2007 بالأمس وانا حاط راسي على الفراش انتظر لحظة اودع فيها يوم شاق ، مستعدا لاستقبال يوم جديد تاخذني الأفكار بعدة اتجاهات منها القديم جدا ومنها احداث يومي العادية ، فكان تفكيري البارح متركز على قضية وحدة كنت ابي حل لها من مدة طويلة . فخطر فبالي بتلك اللحظة هذه الفكرة وهي ليش ما اقوم باجر من الصبح وامر الديوان الاميري واقابل الشيخ حمد او الشيخ تميم وذلك من أجل اني اشرح لهم قضيتي ويكون الحل دائما عند أهل الجود موجدود . نمت وفعلا باليوم الثاني قمت من النوم من فجر الله تعالى ، تسبحت وصليت الفجر وتوكلت على الله ، جلست على التلفزيون شوي أقلب بالأخبار والفضائيات وانا بكل نقلة من فضائية لفضائية أحمد الله تعالى على النعمة الي حنا عايشين فيها وهذا طبعا مقارنة مع احوال الدول الاخرى اللي فيها حروب ونزاعات . أشرقت الشمس بسطوع جميل ورائع ، تناولت كوب من الشاي مع فطيرة جبن بعد ذلك فرشت اسناني واتجهت لغرفتي من اجل اني البس ملابسي الأنيقة ، وكان الهدف هو ما ذكر في حين إنجازه . رحت لسيارتي شغلتها وركبت السيارة وطبعا كعادتي فتحت اذاعة القرءان الكريم واستمعت لبعض الآيات الطاهرة بصوت القارئ أحمد بن علي العجمي رجعت ريوس وطلعت من الطبيلة واتجهت للباب المؤدي للخارج وسلكت الطريق متجها الى الديوان الاميري لمقابلة حضرة صاحب السمو  الشيخ حمد بن خليفة ال ثاني . كان ذاك اليوم يوم جميل ومشرق والنفس فيه رايقة والشوارع ما شاء الله بأحسن حالها واللي زاد استغرابي ان الناس كان عندها نوع من الالتزام الغير طبيعي بقواعد السير . توقفت عند احدى البقالات وذلك لشراء جريدة اليوم ، فلفت نظري اول خبر وهو رسالة شكر من مواطن قطي الى مؤسسة ما ، لا أذكر اسمها ، دورت على شكاوي مني ومناك ما حصلت ، فتيقنت ان اليوم هذا هو اجمل ايام عمري . مشيت الطريق حتى وصلت للديوان الأميري ، طبعا وقفت عند الشرطة اللي عند المدخل الرئيسي ، استقبلوني بابتسامة وتصبيحة خير جميلة ، ما سألني ليش جاي او لاي سبب إكتفى بأخذ اسمي الكامل وتشييك بسيط وسريع على سيارتي وبعدها قالي تفضل يا استاذي الكريم ، مشيت الطريق كله حتى وصلت للمواقف الرئيسية وقفت سيارتي ونزلت متجها الى بوابة الديوان الاميري ، فقابلني ضابط عند باب ومدخل الديوان ،، وكعادة رجال الأمن عندنا ، قابلني بإبتسامة وسلم علي وطلب مني بطاقتي الشخصية وسبب حضوري للديوان .قلتله جيت الديوان من أجل مقابلة والدي الأمير حفظه الله ، فقال ان شاء الله ولا يهمك تفضل لحرم الديوان . دخلت وكنت أتمشى بين جدران الديوان الأميري وأنا احسد نفسي على اللي صاير ومو مصدق اني بهالسهولة قدرت أدخل للديوان الأميري . وصلت الى مكتب سكرتير الأمير حفظه الله وطلبت من مدير المكتب أن يستاذنلي من الامير بمقابلته ان كان مو مشغول ؟ فقالي ولا يهمك اخوي استريح وطبعا الكرم من هله ، طلبلي كوب عصير لحين يستأذنلي بمقابلة حضرة الأمير . بعد دقائق قليلة قالي تفضل الأمير ينتظرك بمكتبه ، دخلت وانا الابتسامة تشق وجهي وشوي واطيرمن الفرح . دخلت و سلمت على الأمير واستقبلني استقبال الأب لأبنه وأجلسني بالكرسي اللي امامه .كانت بيده بعض الاوراق يقراها ويراجعها وأعتقد انها اوراق الدولة والامور الخاصة فيها . انتظرته لين ما خلص وحتى قالي تفضل يا سعود قولي شمشكلتك .. بديت أشرحله مشكلتي ووضعي الحالي من جراء هالمشكلة وبيان الوجه العام للقضية الخاصة لحد ما توقفت من نفسي من الوصف والشرح . ابتسم بوجهي كعادته وقالي ولا يهمك يا سعود ، إعتبر قضيتك ومشكلتك محلولة بإذن الله تعالى ، وانا ان شاء الله بكلم المسؤولين يتابعون قضيتك . طبعا الشكر واجب لاهل الواجب لذا كان شكري له ختام كلامي كلهرجعت البيت وانا مبسوط ومستانس وقلت بعد هاللقاء باخذلي نومه محترمة عشان أقوم لصلاة العصر نشيط .. حطيت راسي على المخدة وتهت بنوم عميق حتى صحيت على صوت الأذان ، قمت اتمغط حتى وصل المؤذن قوله (( الصلاة خير من النوم ……. الصلاة خير من النوم ))شسالفة ……… طبعاً أنا استغربت مثل منتم استغربتوا الحين مني ،، ابتسمت وذلك لاني تيقنت بأني توي قايم من الحلم الجميل اللي اتمنى بيوم من الأيام يكون واقع . تحياتيبقلم / سعود

السلام عليكم ورحمة الله وبركاته

اليوم الخميس قررت اني اروح للسينما وذلك من اجل مشاهدة فيلم الفار اللي يطبخ واعذروني لاني ما اعرف اسمه

عموما رحت متوجها الى سينما الستي سنتر وكانت الزحمة شي فوق الخيال

المدلله لقيت موقف وصفيت فيه ونزلت لحجز تذكرة لدخول للفيلم

دخلت الفيلم وياليتني ما دخلت

القاعة 60 بالمية اطفال ،، عطيت السيكيورتي تذكرتي عشان يرشدني لكرسيي لاني احب اجي من الطرق المختصرة

عموما وصلنا للموقع واللي دايما اسلم امره الى الحظ فمرات اكون محظوظ بموقع استراتيجي ومرات اطلع من السينما بكبرها بسبب الجيرة اللي راح تكون احذاي على الكرسي ،، طبها يميني طفل مع امه ويساري ايضا شاب قطري

جلست وبدا الفيلم وعلى اغنية البداية الا واحد من الشباب خلفي يصرخ على السيكيورتي ؟؟؟!!؟

جاه وقاله شسالفة قال اللي وراي ظايقني ؟

كانهم جهال يعني

عموما كملت الفيلم وما امداني اطالعه لمدة خمس دقايق الا فجر القاعة طفل بصياحه

فجاة اللي جنبي بدا يصيح عند امه يبي يطلع

عدت الامور على خير وانا مرتفع ظغطي

فجاة صاح جوال احد الموجودين وكأنه ستيريوا ،ن لا والاخ يبي يسمع البنات النغمة فخلى الجوال يرن حوال الدقيقتين لين ما سكت لحاله

انا اصريت اكمل الفيلم حتا النهاية ،، ما وعيت والا الطفل اللي جنبي بدأ يرافس ويلعب

بهالحالة

سحبت نفسي وطلعن من السينما

وقلت

العوض ولا الحريمة

تحياتي

سعود

السلام عليكم ورحمة الله وبركاته

أعتدت أن أزور المدونات بشكل اسبوعي وكان لإختفائها أثر

فاقد علمت للتو بخبر وفاة أخت عزيزة ومدونة فاضلة وكريمة من مصر الشقيقه

أنها الأخت داليا صاحبة مدونة واحده بتشوب الدنيا من البيت

http://dalia.arwp.net/

كانت لها ردود كثيرة في مدونتي

انسانه لها كل الاحترام والتقدير

لذالك بإسمي وباسم اهل قطر أتقدم بخالص العزاء والمواساة لاسرة وذوي الفقيده

أسأل الله تعالى أن يرحمها برحمته ويلهم اهلها وذويها الصبر والسلوان

انا لله وانا اليه راجعون 

تحياتي

سعود

السلام عليكم

اليوم حاب أتكلم عن موضوع عشته اليوم وبناء على رغبة بعض الاشخاص الأعزاء راح ادوّن هالموضوع هني

طلعت من الصبح الساعة 8 متجه الى احدى الوزارات لانجاز بعض الاعمال وطبعا ما شاء الله على وزاراتنا كلن يحب يسوي روحه المسؤول وراعي القرارات وانت يالمواطن ظيع بالطوشه

خلصت وطلعت متجها الى فندق الفور سيزن يعني فصول السنة مدري الاربعة

دخلت الفندق الجميل وبصراحة مكان راقي وحلو بس كانت عندي ملاحظة الا وهي ان الرطوبة مخترقة الفندق ^_^

كان هناك مؤتمر بإسم الشباب والتحديات وحسب ما عرفت انه لاول مرة يقام بقطر وكانت لي دعوة من الجامعة الموقرة اني احضر هالمؤتمر اللي كبداية نقدر نقول بانه بايخ نوعا ما

جيت متأخر جدا لدرجة ان كل المصوريين والاعلاميين غادروا المكان وهذا من سوء حظي

بدأ الحديث بالموضوع الاول وهو بصراحة امممممممممممممممممم

اسمحولي اذا قلت مادري عن ايش لانه الكلام كان ملخبط كلن يتفلسف من عنده مرة يدشون بالاختلاط شوي الا غيروا الموضوع للمنهج الدراسي فجأة اقلبوا لتربية الابناء ، يعني بصراحة وبدون مبالغة الكلام كان عشوائي وكثير وكله سخافات واشياء غير مفهموة

جت فترة الاستراحة ورحت شربت عصير فراولة ،، وكان حامض شوي لكن حسب ما سمعت انه بالفنادق الحموضة شي اساسي عشان تحس انه فرش وانه غير وانه مو موجود الا عندهم

رجعنا للموضوع الثاني وكان عن المشاركة السياسية

تكلموا وكلن قام يمدح ويشيد بدور الدول ولاحكومات في الديمقراطية

حتى وصلوا بالحديث الى المدونات

وقالوا بان المدونات اكبر دليل على الحرية

بهالحالة طلبت التكلم بعد صمت دام طول فترة المؤتمر ، وقلت بأن الكلام اللي تدعونه خاطئ وأكبر دليل انه كل يوم والثاني نسمع بأن المدوّن الفلاني قد أحتجز بدون سبب مقنع ؟

واضفت أيضا بأنه مهما كانت هناك ديمقراطية هناك هناك حدود تضع صاحبها تحت مؤشر الخطر

وايضا بان الكتاب والصحفيين اللي يعبرون عن رأيهم بحرية ماهم الا صورة تتكشخ فيها الدول أمام الدول الثانية

كلامي هذا نرفز الكثيرين حتى رد  الكاتب حسن الجفيري على كلامي وقال بأن المدونين يسبون ويتكلمون بدون قواعد وحدود

(( هذا طبعا عقب ما تكلمت وقبل لا اتكلم كان يقول بان المدونات نموذج لحرية التعبير ))

شفتوا التناقض ؟؟

فجاة رد أحد الموجودين وعقب على كلامي بان من حق الحكومات والدول ان توقف المدون عند حد معين وانه حتى الشخص العادي لو حس بالخطر من شخص اخر اكيد راح يوقفه

وراه على طول ردة الأخت بان المدونة برنامج صغير يركبونه بخمس دقايق ويقدر اي شخص يتكلم فيه بحرية ويسب بأسماء مستعارة

وكانها تقلل من قيمة المدون

بعدها على طول عقب احد المسؤولين بجامعة قطر على كلامي بطريقة شبه استفزازية بانه الدول والمؤسسات تعمل على انشاء اتحادات

ومنها كمثال قطر اللي تبي تسوي اتحاد طلابي

ولنفرض بان قطر عملت اتحاد طلابي ؟

الاشكال اللي راح تكون فيه معروفة

بعد كل هالتخلف اللي عشته مع متخلفين سحبت نفسي تارك المؤتمر لانه بصراحة اشبه بالجامعة العربية

مواضيع عشوائية بلا هدف وقيمة

يعني تيتي تيتي مثل ما رحتي جيتي

تحياتي

سعود